Onse (11) ka kinabuhi ang nakalas human nahagsa ang usa ka sibilyan nga eroplano nga nagkarga og mga skydiver sa lungsod sa Tomblaine, sa sidlakang bahin sa France.
Lakip sa mga namatay ang piloto ug napulo ka pasahero, nga gilangkuban sa lima ka mga estudyante ug lima ka mga instruktor gikan sa usa ka parachuting school.
Sumala sa inisyal nga report, bag-o pa lang milupad ang eroplano gikan sa Nancy-Essey Airfield sa dihang nahitabo ang aksidente.
Gihangyo sa mga awtoridad ang publiko nga likayan ang palibot sa insidente samtang nagpadayon ang imbestigasyon aron matino ang hinungdan sa pagkahagsa sa maong eroplano.
Gikumpirma usab sa mga opisyal nga wala’y laing sibilyan sa yuta nga naangol sa trahedya, samtang paingon sa lugar ang French Interior Minister aron personal nga masubay ang kahimtang ug ang pagresponde sa gobyerno.