Usa ka 20-anyos nga estudyante sa Vietnam ang gidayeg karon isip usa ka tinuod nga bayani human gibuhis ang iyang kaugalingong kaluwasan aron maluwas ang pito ka mga tawo nga natanggong sa usa ka unom ka andana nga residential building nga nasunog sa Hanoi niadtong Marso 24, 2026.
Ang batan-ong si Nguyen Le Tu, diin pauli na gikan sa pag-ehersisyo, nakamatikod sa dakong kalayo nga milamoy sa maong building.
Imbis nga mulikay sa peligro, miduol kini aron motabang sa mga residente nga nanginahanglan og tabang. Una niyang gipagawas ang duha ka tigulang pinaagi sa usa ka hagdan.
Sa dihang nahibal-an niyang adunay uban pang mga tawo, lakip ang mga babaye ug kabataan nga nahabilin pa sulod sa building, wala siya magduhaduha sa pagbalik bisan pa sa nagkakusog nga kalayo ug mabagang aso.
Aron makasulod pag-usab sa building, iyang gibasa og tubig ang iyang gisul-ob ug gitabon kini sa iyang ilong ug baba aron makaginhawa samtang nagpadayon sa rescue operation.
Tungod sa iyang kaisog ug determinasyon, malampuson niyang naluwas ang pito ka mga residente. Apan human sa insidente, siya ug pipila sa iyang natabangan gidala sa ospital tungod sa epekto sa smoke inhalation.
Bisan pa sa iyang nasinati, wala niya ipahibalo dayon sa iyang inahan ang tinuod nga nahitabo.
Sa dihang mitawag siya, miingon lamang siya nga “nadagma” aron dili na kini mabalaka. Si Tu usa ka ikaduhang tuig nga estudyante sa Engineering Physics sa Hanoi University of Science and Technology ug nailhan sa iyang maayong pamatasan ug dedikasyon sa pagtuon.
Isip pag-ila sa iyang talagsaong kabayanihan, gihatagan siya sa Ho Chi Minh Communist Youth Union og “Brave Youth” badge, samtang gipasidunggan usab siya pinaagi sa usa ka Certificate of Commendation gikan sa Acting Minister of Education sa Vietnam.