Kabsan sa kinabuhi ang usa ka 44-anyos nga lalaki human siya gipusil sa likod sa gawas sa iyang panimalay sa Sitio Bahucanon, Barangay Cabadiangan, Kadingilan, Bukidnon niadtong Hunyo 26.
Sa ekslusibong pakighinabi sa Bombo Radyo Malaybalay kay PMaj. Guy R. Pacamo – Officer In-Charge-Kadingilan Municipal Police Station, gisaysay niini nga bag-o lang nagsag-ub og tubig ang biktima ug pag-abot na sa ilang balay sa dihang gitawag niya ang iyang asawa kalit siyang gipusil sa suspek.
Nasayran usab nga adunay silingan ang nakadungog sa buto ug nakaila sa giingong suspek pinaagi sa kahayag sa suga sa maong lugar sa wala pa kini midangop paingon sa wala mailhing direksyon.
Sa pag-inspeksyon sa crime scene, narekober sa mga awtoridad ang mga basiyo sa bala ug usa ka fired bullet.
Gituohang personal nga panagbingkil nga may kalabotan sa panagbangi sa pamilya ang posibleng motibo sa krimen.
Padayon ang hot pursuit operation ug imbestigasyon sa kapulisan alang sa pagdakop sa suspek ug pagsang-at sa angayng kaso batok kaniya.