Gikumpirma sa Philippine Embassy nga luwas ang mga Pilipino sa Venezuela human sa serye sa mga linog nga miigo sa maong nasud.
Sa eksklusibong pakighinabi sa Bombo Radyo Philippines, kang Consul Judy Razon sa Philippine Embassy nga nakabase sa Colombia ug adunay sakop nga hurisdiksyon sa Venezuela, gipadayag niini nga wala’y naitalang Pilipino nga nasamdan o namatay tungod sa mga pagyanig.
Matod ni Razon, padayon nga nakigkoordinar ang embahada sa mga Filipino community sa nagkalainlaing bahin sa Venezuela, lakip ang Caracas, Barinas, Miranda, Anzoátegui ug Mérida.
Bisan pa sa pagdeklara sa estado sa emerhensiya sa nasud ug sa nagpadayon nga rescue operations, gipasalig sa mga Pilipino didto nga sila anaa sa maayong kahimtang.
Nagpadayon usab ang embahada sa pagmonitor sa sitwasyon pinaagi sa ilang komunikasyon sa mga Filipino community leaders ug sa WhatsApp group chats aron masiguro ang kaluwasan sa tanang Pilipino sa maong nasud.