MALAYBALAY CITY — Duha ka kanhing sakop ug lider sa Militia ng Bayan (MB) ubos sa nabungkag nga Guerilla Front sa CPP-NPA ang boluntaryong mitahan sa mga otoridad sa managlahing operasyon niadtong Hunyo 23.
Base sa report sa Bukidnon Police Provincial Office (BPPO), unang mitahan sa 1st Bukidnon Provincial Mobile Force Company (1st BPMFC) sa Barangay 7, Malaybalay City ang usa ka 53-anyos nga lalaki nga giila sa mga alyas nga “Damok”, “Jambo”, ug “Siga”. Siya nailang kanhing Team Abe Squad Leader sa Platoon 1 ubos sa nabungkag nga Guerilla Front 89.
Samtang sa lungsod sa Don Carlos, mitahan usab sa 2nd BPMFC sa Barangay Pinamaloy ang usa ka 56-anyos nga giila sa alyas “Honey”, kinsa kanhing miyembro sa Militia ng Bayan ubos usab sa nabungkag nga Guerilla Front 68.
Kini nga kalamposan napatuman pinaagi sa malampusong intelligence-driven operations sa kapulisan ug militar, inabagan sa Bukidnon Provincial Intelligence Unit. Sa kasamtangan, anaa na sa kustodiya sa mga otoridad ang duha alang sa gihimong debriefing ug profiling samtang gihan-ay na ang ilang mga dokumento aron makadawat og ayuda ug panginabuhian gikan sa Enhanced Comprehensive Local Integration Program (E-CLIP) sa gobyerno.