Nagpaalim karon sa balay tambalanan ang usa ka 21-anyos nga batan-on human kini gi-ambush ug gipusil sa likod samtang pauli gikan sa uma didto sa Sitio Calacapan, Barangay Mandahican, Cabanglasan, Bukidnon niadtong Hunyo 23 sa hapon.
Matod pa sa Cabanglasan Municipal Police Station, nagsakay sa motorsiklo ang biktima kauban ang iyang igsoon nga maoy nagmaneho sa dihang kalit silang gipara sa suspetsado nga giila lang sa alyas “Etel”, 36-anyos. Sa walay langan, gipusil sa suspek ang biktima gamit ang wala pa matino nga klase sa armas ug dinalian kining gidala sa Cabanglasan Municipal Health Office human nakaangkon og samad sa likod.
Nasuta sa inisyal nga imbestigasyon sa kapulisan nga daan nga panaglalis sa yuta ang motibo sa maong panagbangi sa duha ka partido. Sa kasamtangan, miikyas ang suspetsado paingon sa wala matino nga direksyon ug padayon pa ang gihimong hot pursuit ug dragnet operation sa mga otoridad aron kini madakpan ug pasakahan og saktong kaso.