Nasulod sa kasaysayan ang Chinatown International District sa Seattle, USA human malampuson nga nakabungkag sa Guinness World Record pinaagi sa pagtigom og 830 ka tawo nga nagdungan og kaon og dim sum sa usa ka block party summer kickoff.
Ang kanhing rekord nga duna’y 764 ka partisipante didto sa Sydney, Australia niadtong 2019 pormal nang naapsan sa maong kalihokan. Ang maong dako nga salo-salo giatiman sa sikat nga Jade Garden restaurant, diin ang ilang chef team ug ang amahan sa tag-iya nga si Eric Chan dinalian nga naghimo og kapin 3,600 ka dumplings ug buns alang sa mga misalmot.
Bisan pa man og miabot sa dapit 900 ka tawo ang mitambong, 830 lamang ang opisyal nga giihap sa Guinness adjudicator tungod kay ang uban wala nagpabilin sa ilang mga lingkuranan sa dihang gihimo ang headcount. Dako usab ang kalipay ni Chan sa maong dako nga kalamposan nga nagdala og dungog sa tibuok Seattle ug sa ilang negosyo sa pamilya.