Gisaway ni Pope Leo XIV ang gitawag niyang “progressive bureaucratization of solidarity” o ang sobra nga proseso ug mga balakid sa burukrasya nga nakapahinay sa paghatod sa ayuda ngadto sa mga gigutom sa nagkalain-laing bahin sa kalibutan.
Sa pagbisita sa Santo Papa sa punoang buhatan sa World Food Programme sa Rome, nanawagan ang Santo Papa sa internasyonal nga komunidad nga dugangan ang pondo para sa pagsulbad sa kagutom ug kuhaon ang mga babag nga makapugong sa pag-abot sa tabang sa mga nanginahanglan.
Matud ni Pope Leo XIV, samtang lisod ug hinay ang paghatod sa humanitarian aid tungod sa mga proseso ug limitasyon, mas dali hinuon ang paglihok sa mga armas nga nagpadayon sa pagpukaw sa mga gubat ug panagbangi.
Gipasiugda niini nga kinahanglan mausab ang prayoridad sa kalibutan ug mas unahon ang kinabuhi ug panginahanglan sa katawhan kaysa panagbangi.
Gipasabot usab sa Santo Papa nga adunay igo nga kapasidad ang kalibutan aron malikayan ang kagutom, apan dagkong kapanguhaan ang gigasto gihapon sa gubat imbes nga sa pagkaon, kalamboan, ug tabang para sa mga kabus.