Gikumpirma ni Senate Secretary Attorney Renato Bantug Jr. nga dili pa mahuman dayun ang pre-trial conference sa impeachment case batok kang Vice President Sara Duterte tungod sa kadaghan sa mga dokumentong kinahanglan markahan isip ebidensya.
Sumala ni Bantug, kapin sa 4,000 ka panid nga dokumento ang gi-review ug gimarkahan pa lamang alang sa Article 1 sa impeachment complaint, nga may kalabotan sa giingong sayop nga paggamit sa ₱612.5 milyon nga confidential funds sa Office of the Vice President ug Department of Education gikan sa 2022 hangtod 2023.
Bisan pa niini, gipatin-aw sa abogado nga hapsay ug paspas ang proseso tungod kay adunay igo nga personnel ug mga team nga nagtrabaho sa matag artikulo sa reklamo.
Bisan sa kadaghan sa ebidensya, gisiguro sa Senado nga masunod gihapon ang iskedyul sa impeachment trial nga opisyal nga magsugod sa Hulyo 6.
Ang pre-trial conference gilauman nga mahuman sa Hunyo 25 subay sa impeachment calendar nga giaprubahan sa Senado.
Samtang, wala pa makahukom ang mayoryang grupo sa Senado kung kinsa ang mahimong presiding officer sa impeachment trial.
Apan sumala kang Senate President Sherwin Gatchalian, siya sa pagkakaron ang mangulo sa pagdungog subay sa gisugo sa Konstitusyon hangtod adunay laing opisyal nga mapili.
Sa bahin sa depensa, nagpadayag si Atty. Michael Poa nga andam silang moatubang sa proseso basta masunod ang impeachment rules ug ang mga lagda sa Senado.