Gimando sa Department of Agriculture (DA) ang usa ka komprehensibo ug masusing structural assessment sa General Santos Fish Port Complex human temporaryong gipisira ang pipila ka bahin niini gumikan sa kusog nga magnitude 7.8 nga linog nga miigo sa Mindanao niadtong Hunyo 8.
Si Agriculture Secretary Francisco Tiu Laurel Jr. mismo ang nagmando sa mas lawom nga pagsusi human sa inisyal nga inspeksyon nga miresulta sa temporaryo nga pagsira sa Market Halls 1, 2, ug 3, samtang gilimitahan usab ang paggamit sa Market Hall 4. Tumong sa maong dugang inspeksyon, lakip na ang geotechnical investigation, nga masiguro ang hingpit nga kaluwasan sa mga trabahante ug negosyante ilabi na nga padayon pa ang mga aftershock sa maong dapit.
Sa pikas bahin, gipahayag ni Philippine Fisheries Development Authority (PFDA) Acting General Manager Glen Pangapalan nga base sa ilang paunang pakisusi, nagpabilin gihapong “structurally sound” o lig-on ang pantalan ug wala’y natala nga nasamdan o namatay sa insidente. Padayon gihapon ang operasyon sa pasilidad ubos sa mga gipatuman nga contingency measure aron masiguro nga dili mabalda ang suplay sa isda ug ang negosyo sa export sa General Santos City kinsa nailang tuna capital sa nasod.