Miulbo ang usa ka dakong sunog sa Viva Wyndham Dominicus Beach Hotel sa Bayahíbe, Dominican Republic nga misangpot sa kamatayon sa usa ka 46 anyos nga turistang Italyana ug pagkasamad sa siyam pa ka mga indibidwal.
Giila sa mga otoridad ang namatay nga si Francesca Valentino, kinsa gituohang namatay tungod sa paglanghap og bagang aso gikan sa sunog.
Tulo sa mga nasamdan ang gidala sa ospital samtang unom ang gitambalan dayon sa lugar.
Sumala sa mga report, paspas nga mikatag ang kalayo tungod sa kusog nga hangin ug sa mga atop nga hinimo sa pawid o uga nga dahon sa palma.
Tungod sa insidente, gilayon nga gi-evacuate ang 1,690 ka turista, lakip ang kapin sa 200 ka mga bata ug masuso, ug gibalhin ngadto sa mga duol nga hotel sa Punta Cana ug Bayahíbe.