Subling nagmugna og kasaysayan ang Filipina tennis star nga si Alex Eala human mapildi niini ang world No. 8 nga si Elina Svitolina sa quarterfinals sa Berlin Tennis Open sa straight sets sa iskor nga 6-3, 6-4.
Pinaagi sa maong kadaugan, nakauswag si Eala ngadto sa semifinals diin atubangon niini ang Czech player nga si Linda Noskova.
Sa unang set, misugod si Eala ug nakalampos og 3-0 nga abante sa wala pa nakaiskor si Svitolina. Bisan pa og nakaduol ang Ukrainian star sa 4-3, napildi gihapon kini ni Eala nga midaog sa sunod nga duha ka dula aron makuha ang unang set.
Sa ikaduhang set, nagtabla una ang duha sa 2-2. Apan nakahimo si Eala og kusog nga ratsada aron makaabante sa 5-2.
Nakasukol pa si Svitolina ug nakadaog sa duha ka sunod nga duwa, apan nagpabiling lig-on si Eala ug gitapos ang dula aron maselyohan ang pag-abante sa semifinals.