Gipaspasan karon sa mga awtoridad ang malukpanong search and rescue operation didto sa Mt. Kalatungan, ning lungsod, alang sa nahanaw nga 31-anyos nga hiker nga si Alkharj Gomez Zamayla, kinsa nadiskubrihang walay bitbit nga opisyal nga permit sa iyang pagsaka.
Gikompirma ni Police Major Joann Navarro, ang tigpamaba sa Police Regional Office (PRO)-10, nga katapusang nakit-an ang biktima niadtong Hunyo 12 taliwala sa alas-8:00 hangtod alas-10:00 sa buntag duol sa Camp 1. Subay sa nakuhang report, miapil si Zamayla sa upat ka adlaw nga hiking activity uban ang kapin 80 ka mga hikers, apan nasuta nga wala kini nikuha og Visitor Entry Permit ug wala usab makig-coordinate sa mga lokal nga awtoridad. Sa pagkakaron, nagtinabangay na sa pagpangita ang Pangantucan Rescue Team, kapulisan, 1004th Maneuver Company, PENRO, ug mga boluntaryo, apan nakapahinay sa operasyon ang lisod nga terrain, kakuwang sa signal, ug dautang panahon.
Gumikan niini, nanawagan ang PRO-10 sa unsa mang hikers o indibidwal nga duna’y kasayuran sa nahimutangan sa biktima nga dinalian kining ipahibalo sa Pangantucan Municipal Police Station. Dungan niini, gipahumdoman sa kapulisan ang publiko sa kamahinungdanon sa pagkuha og permit ug pagpakig-alayon sa mga otoridad sa dili pa mosaka sa mga kabukiran aron malikayan ang susamang insidente.