Giawhag sa kagamhanang lokal sa Valencia, Bukidnon ang publiko nga ireport ang mga reklamo batok sa mga pasaway nga driver sa pampublikong transportasyon nga dili mosunod sa ordinansa.
Lakip sa mga ipasaka nga reklamo ang sobra nga pagpangayo og plete, kulang nga pagsukli, dili paghatag sa sakto nga diskwento alang sa mga estudyante, senior citizens ug persons with disabilities (PWDs), ug dili maayong pagtratar sa mga pasahero.
Ang mga reklamo mahimong isumite direkta sa opisina ni Konsehal Rosal, Chairperson sa Committee on Public Transportation, o pinaagi sa official Facebook page sa City Government of Valencia, Bukidnon.
Aron mas mapadali ang aksyon, giawhag ang publiko nga kompletohon ang detalye sa reklamo sama sa litrato sa sakyanan nga makita ang body number, ngalan sa asosasyon kung aduna, oras ug petsa sa insidente, ruta, ug litrato sa sulod sa sakyanan kung walay taripa o fare matrix.
Gipahinumdoman usab nga adunay katugbang nga silot ang mga mapamatud-ang nakalapas sa regulasyon.
Giawhag ni Mayor Amie G. Galario ug Vice Mayor Greizl Galario-Fernandez ang responsableng serbisyo ug pagpanalipod sa katungod sa mga pasahero.
Ang kooperasyon sa publiko giisip nga importante aron masiguro ang patas, hapsay, ug matinahurong serbisyo sa pampublikong transportasyon sa dakbayan.