Talagsaon nga atraksyon ang nakapadani sa mga mamalitay sa usa ka supermarket sa Estonia, usa ka higanteng bato nga gibana-bana og 22 metros ang kahabogon ug 6 metros ang gilapdon, apil ang bahin nga nalubong sa yuta. Ang bato mas karaan pa kaysa sa shopping center ug gituohang kapin 10,000 ka tuig na ang kagulangon.
Nadiskobrehan kini atol sa pag-ukay sa lugar alang sa konstruksyon sa supermarket.
Sa una, plano unta sa mga trabahante nga tipakon ang bato, apan gisupak kini sa mga lokal tungod kay kini usa ka erratic boulder—usa ka matang sa bato nga gidala sa mga glacier gikan sa laing lugar ug nabilin sa dihang natunaw ang yelo liboan ka tuig ang milabay.
Karun, nahimo na kini nga usa sa mga pinakadakong atraksyon sa supermarket diin daghang bisita ang nagpakuha og litrato ug video uban sa maong higanteng bato.