Boluntaryong mitahan ang lima ka miyembro sa New People’s Army (NPA) ngadto sa hiniusang pwersa sa Philippine Army ug Philippine National Police sa Lanuza, Surigao del Sur, samtang laing tulo usab sa Northern Mindanao niadtong milabayng bulan.
Dala niini ang tag-as nga kalibre sa mga armas.
Ang maong pagsurender nahimong timailhan sa hingpit nga pagkapuo sa insurhensiya.
Giisip nga usa na usab kini ka dakong kalampusan nga natala sa gobyerno sa kampanya batok sa insurhensiya, human hingpit nga nabungkag ang North Eastern Mindanao Regional Committee sa Communist Terrorist Group (CTG) tungod sa walay hunong nga operasyon sa 4th Infantry Division sa militar.
Natala ang maong kadaugan human mitahan ang lima ka kanhi-miyembro sa CTG niadtong Hunyo 2 sa nahisgutang dapit.
Kauban niini, gitugyan usab nila ang nagkadaiyang armas, lakip na ang RPK machine gun, mga M16 rifle, M203 grenade launcher, ug uban pang kagamitang pang-gubat.
Ang maong kalampusan nagpamatuod sa pagka-epektibo sa ilang clearing operations ug koordinasyon sa nagkadaiyang ahensya aron hingpit nga tapuson ang insurhensiya sa ilang area of responsibility.
Kahinumduman nga gipahayag ni 4th ID Commander, Major General Marion T. Angcao sa 4th Infantry Diamond Division, nga ang hingpit nga pagkapukan sa NEMRC usa ka dakong lakang padulong sa pagkab-ot sa malungtarong kalinaw ug seguridad.
Matud pa niini, magpadayon ang kolaborasyon sa militar uban sa nagkadaiyang ahensya sa gobyerno ug lokal nga komunidad aron mapadayon ang kalinaw, malikayan ang pagtumaw pag-usab sa insurhensiya, ug masiguro ang luwas ug mauswagon nga kinabuhi alang sa mga lumulupyo.
Sa pagkakaron, gipasalig sa gobyerno ang padayon nga paghatag og ayuda sa mga mitahang rebelde pinaagi sa Enhanced Comprehensive Local Integration Program (E-CLIP) ug uban pang mga peace-building initiatives.