Gisiguro sa Philippine National Police (PNP) nga malinawon ug subay sa balaod ang pagdawat ug pagtipig sa 20 ka armas nga nalambigit kang Senador Ronald “Bato” dela Rosa human sa pagkansela sa iyang License to Own and Possess Firearms o LTOPF.
Base sa PNP, boluntaryong gitugyan ang mga armas niadtong Hunyo 11, 2026, pinaagi sa awtorisadong legal representative sa senador sa usa ka pinuy-anan sa Barangay Maa, Davao City.
Gihimo sa Regional Civil Security Unit-11 ang imbentaryo ug inspeksyon sa matag armas, lakip ang pag-verify sa mga serial number, sa wala pa kini opisyal nga dawaton alang sa safekeeping.
Human sa proseso, gidala ang mga armas ngadto sa RCSU-11 sa Camp Sgt. Quintin M. Merecido sa Buhangin, Davao City diin kini karon gitipigan ubos sa kustodiya sa PNP.
Matod ni PNP Chief General Jose Melencio Nartatez Jr., importante nga ang pagpatuman sa balaod mahitabo nga adunay pagtahod sa hustong proseso, transparency ug propesyonalismo.
Samtang, wala pa maklaro kon ang 20 ka armas mao na ang tanan nga nasakop sa revocation order o kabahin lamang sa mas daghang armas nga narehistro sa pangalan sa senador.
Sa laing bahin, nagpadayon ang kampo ni Senador dela Rosa sa pagtuon sa legal nga mga remedyo batok sa desisyon sa pagkansela sa iyang lisensya ug firearm registrations.
Sa pagkakaron padayon ang PNP sa pagmonitor ug pagdumala sa mga armas subay sa mga balaod ug regulasyon sa nasud.