Gisentensiyahan sa korte sa United Kingdom ang usa ka Amazon delivery driver human kini nasakpan sa doorbell camera nga nangawat sa iring sa usa ka pamilya samtang naghatod og parcel didto sa West Yorkshire. Giila ang maong driver nga si Catalin Stancu, 41 anyos, kinsa dinalian nga mikugos ug misulod sa iyang sakyanan sa tulo ka tuig nga iring nga ginganlag “Nora.” Nag-viral sa social media ang maong video human kini gi-post sa tag-iya aron ipanawagan nga mabalik ang ilang binuhi nga aduna’y sakit sa kasingkasing ug nagkinahanglan og dinalian nga tambal.
Tungod sa grabeng pagsaway nga nakuha sa internet, misulay pa si Stancu sa pagkontak sa pamilya pinaagi sa TikTok aron iuli ang iring, diin nangatarungan pa kini nga abi niya og usa ka “saag” o walay tag-iya nga mananap gumikan kay nag-ulan niadtong panahona. Luwas ra nga nabalik si Nora sa iyang pamilya human sa tulo ka adlaw nga pagkawala.
Tungod sa maong binuhatan, si Stancu niangkon nga sad-an sa kasong pet abduction ug gisentensiyahan og walo ka semana nga pagkabilanggo apan gisuspende kini sulod sa 12 ka bulan, dungan sa pagbayad og £500 o kapin P37,000 isip bayad-danyos. Ang maong kaso giila nga usa sa mga unang pagpatuman sa bag-ong balaod nga Pet Abduction Act sa maong nasod, nga naghatag og mas bug-at nga silot sa pagpangawat og mga binuhi tungod kay giisip na kini karon nga mahinungdanong bahin sa pamilya ug dili basta-basta nga kabtangan lamang.