Giklaro sa Malacañang nga walay nahitabong constitutional crisis sa nasod taliwala sa nagpadayong tensyon sa liderato sa Senado. Subay sa pamahayag ni Palace Press Officer USec. Claire Castro, lig-on ang baruganan sa ehekutibo nga si Acting Senate President Win Gatchalian ang ilang opisyal nga gikinilalang lider sa taas nga kapulungan, ilabi na sa pagpahigayon og mga special session ug sa nagpadayong impeachment trial.
Dungan niini, nanawagan ang Palasyo og dinaliang pakisusi kalabot sa pagkahugno sa daghang mga establisimento gumikan sa magnitude 7.8 nga linog sa Mindanao. Tumong sa maong lakang nga masuta kon napatuman ba og husto ang National Building Code sa mga nangagubang istruktura, aron papanubagon sa balaod ang kinsa mang duna’y pagkulang ug depekto sa pagpatukod niini.
Sa pikas bahin, gikumpirma usab ni USec. Castro nga duna na’y nakalinya nga iskedyul si Presidente Ferdinand “Bongbong” Marcos Jr. sa pagbiyahe ngadto sa Mindanao. Kini aron personal nga lilion ug susihon ang kahimtang sa mga residente ug mga dapit nga grabeng gihandosan sa kalamidad, bisan pa man wala pa gipagawas sa Palasyo ang eksaktong petsa sa maong pagbisita.