Hilabihang naangol ug talandugon karon ang kahimtang sa duha ka 22-anyos nga lalaki human hingpit nga nabangga ang ilang gisakyan nga motorsiklo ngadto sa usa ka tindahan sa Purok 2, Barangay Bangcud, Dakbayan sa Malaybalay, sayong bahin sa kaadlawon niadtong Hunyo 8.
Subay sa hiniusang imbestigasyon sa Malaybalay City Police Station ug Traffic Management Center o TMC, nagbiyahe ang maong motorsiklo gikan sa sentro sa syudad paingon unta sa Valencia City. Pag-abot duol sa Alvarez Store, kalit nga nawad-an og kontrol sa manubela ang drayber hinungdan nga mideretso kini gawas sa karsada ug mibangga sa maong establisemento.
Gumikan sa kusog nga impak, lagpot sa yuta ang drayber ug ang angkas niini nga parehong nakaangkon og seryosong samad sa nagkadaiyang bahin sa lawas diin dinaliang gidala sa tambalanan. Nasuta usab sa kapulisan nga gawas nga expired na ang rehistro sa maong motorsiklo, dako ang posibilidad nga ubos sa impluwensya sa makahubog nga ilimnon ang drayber sa wala pa ang maong disgrasya nga nagbilin usab og danyos sa maong tindahan.