Gipadayag sa DepEd Bukidnon pinaagi ni Dr. Rollen B. Sumo Oy, Senior Education Program Specialist nga andam na ang mga tulunghaan alang sa umaabot nga pagbukas sa klase sa Lunes, pinaagi sa koordinasyon sa central, regional, ug division offices aron matubag ang mga kakulangan sa mga eskwelahan.
Sumala ni Oy, nga gipaningkamutan sa opisina ang dinaliang pag-release sa Maintenance and Other Operating Expenses (MOOE) aron makapalit dayon ang mga eskwelahan sa basic needs sama sa printer, bond paper, ug school supplies, nga makita na sa social media posts sa mga eskwelahan.
Dugang pa, gipasiugda sa DepEd ang padayon nga partnership uban sa mga pribadong sektor ug mga foundation pinaagi sa CSR programs, diin nagahatag sila og school supplies, bangko, ug uban pang gamit sa mga nagkalain-laing eskwelahan sa lalawigan.
Lakip niini ang suporta gikan sa pribadong establishemento ug uban pang local partners nga nakatabang na sa daghang eskwelahan.
Giila usab ang suporta sa mga LGU nga nag-apil sa pag-andam pinaagi sa pagpaayo sa mga pasilidad ug paghatag og dugang tabang sa mga eskwelahan.
Sa kinatibuk-an, nagpadayon ang DepEd Bukidnon sa pagpangandam aron masiguro nga andam ug kompleto ang mga tulunghaan sa pagsugod sa klase.