Gibulgar sa usa ka grupo nga nagpaila isip “ex-Marines” sa pagdungog sa Senado niadtong Huwebes, Hunyo 4, nga adunay giingong miting tali sa kanhi House Speaker Martin Romualdez ug kanhi Senador Antonio Trillanes IV uban sa mga imbestigador sa International Criminal Court.
Sumala sa usa ka testigo nga kanhi staff ni kanhing Cong. Zaldy Co, ang grupo sa mga sundalo matud pa maoy naghatag og security sa mga langyaw nga bisita nga naglibot ug nakigpulong sa mga lokal nga politiko.
Giingong nagsugod ang maong mga pagtigom niadtong Disyembre 2023.
Matud sa testimonya, si Trillanes nakigkita sa usa ka hotel sa Makati, samtang si Romualdez ug Rep. Zaldy Co nakigpulong usab sa mga langyaw sa usa ka townhouse sa McKinley.
Laing testigo, sumala niini nga gipa-ilisan ang duha ka maleta nga naglangkob og ₱50 milyon hangtod ₱60 milyon matag usa ngadto sa dolyar aron ihatag sa ICC.
Apan gipanghimakak ni Trillanes ang maong mga alegasyon ug miingon nga kini peke ug porma sa “bribery scheme” aron dauton ang proseso sa ICC.
Nagpasaka na usab siya og mga kaso batok sa 18 ka “ex-Marines” ug sa abogado nga nagpasaka sa reklamo.
Gipatin-aw usab sa ICC nga walay kamatuoran ang mga alegasyon nga sila gipondohan sa lokal nga politiko ug gibarogan niini ang ilang independensya.