Gibutyag sa giingong 18 ka kanhing Marines nga sila matud pa ang naghatod og mga maleta nga puno sa kuwarta ngadto sa pipila ka mga iladong opisyal sa gobyerno, lakip na sila Pangulong Ferdinand Marcos Jr., Senador Vicente Sotto III, Senador Erwin Tulfo, ug Leila de Lima, kauban usab si kanhing ACT Teachers Party-list Rep. France Castro ug uban pang personalidad.
Base sa joint affidavit sa 18 ka kanhing sundalo nga giingong mga personahe o bagman ni kanhing Ako Bicol Party-list Rep. Zaldy Co, diin sila matud pa ang nagdeliver og bilyon-bilyong piso nga kickbacks gikan sa flood control projects nga gisulod sa mga maleta, diin matag usa adunay kapin ₱48 milyon.
Gikumpirma usab sa testigong si Bernard Gumban nga kaduha siyang nakahatod sa balay ni Senador Tulfo, una gamay ug medium nga maleta nga gibanabana ₱20–50 milyon, ug ikaduha unom ka lain-laing gidak-on nga maleta.
Sa Senate hearing sa flood control mess, sigon sa usa ka ex-marine nga si Johnny Buduan nga niadtong 2022 nakahatod sila og lima ka maleta sa Ilocos Norte nga giingong alang kang Pangulong Marcos.
Matud sa testigo, adunay usab mga maleta nga gihatod sa panahon sa kampanya niadtong 2022 nga gidawat matud pa ni Rep. Sandro Marcos samtang si Zaldy Co maoy nagdokumento pinaagi og litrato.
Gipahayag usab nga si Senador Sotto, gihatdan og lima ka dagkong maleta sa Baclaran, Parañaque niadtong 2024 sa wala pa ang election campaign period.
Lakip usab sa giingong listahan sa mga nakadawat o pirmi makigkita kang Zaldy Co mao sila Rep. France Castro, kanhing Rep. Leila de Lima, ug kanhing Rep. Raoul Manuel.
Nalakip usab si kanhing Senador Antonio Trillanes IV nga giingong gihatagan og pondo alang sa ICC investigation, ug si Fr. Flavie Villanueva.
Uban pang mga mambabalaod nga giingong naapil sa listahan mao sila Rep. Terry Ridon, Rep. Gerville Luistro, kanhing Rep. Arlene Brosas, Rep. Benny Abante, Rep. Zia Adiong, Rep. Jose Alvarez, kanhing Rep. Ace Barbers, Rep. Joel Chua, kanhing Rep. Dan Fernandez, Rep. Janette Garin, ug kanhing Rep. Stella Quimbo.