Gilauman sa labor sector nga mahimong “fresh start” alang sa Department of Labor and Employment o DOLE ang pagka-appoint ni kanhi Senador Francis Tolentino isip bag-ong kalihim sa ahensya.
Bisan pa nga wala pa kaayo mailhi si Tolentino sa labor movement ug labor relations, naglaum gihapon sila nga makadala kini og bag-ong ideya ug kusog sa pagsulbad sa mga dugay nang problema sa mga mamumuo sa nasud.
Matud ni Atty. Jose Sonny Matula, usa sa pinakaunang hagit nga angay atubangon ni Tolentino sulod sa iyang unang 100 ka adlaw isip DOLE Secretary mao ang pagsuporta sa panawagan alang sa P200 nga wage hike sa tibuok nasud.
Gidugang usab niini nga kinahanglan mapalig-on ang labor inspection sa mga planta, opisina ug pabrika aron masiguro nga nasunod ang labor standards ug occupational safety sa mga mamumuo.
Nanawagan usab ang labor groups nga tutukan sa bag-ong kalihim ang mga kaso sa pagpatay ug pagpanghadlok sa mga labor leaders ug union organizers aron masiguro nga mapanalipdan ang katungod sa mga trabahante sa Pilipinas.