Giingong depresyon ang gilantaw nga anggulo sa kamatayon sa lalaking gisunog ang kaugalingong balay lakip ang iyang kaugalingon sa Agusan Canyon, PI-3, Manolo Fortich, Bukidnon.
Sa pakighinabi sa Bombo Radyo Malaybalay, gikumpirmar ni PLTCOL Rogie C. Ortencio, Chief of Police sa Manolo Fortich Police Station, nga walay foul play nga nakita sa inisyal nilang imbestigasyon ug posible’ng nakaapekto sa biktima ang pagkamatay sa iyang igsoon sa stabbing incident niadtong milabayng bulan.
Matud ni Ortencio, nakadawat sila og report gikan sa concerned citizen alas dose kwarenta (12:40) sa udto mahitungod sa sunog nga nahitabo sa maong lugar hinungdan nga miresponde dayon ang mga pulis ug personnel sa Bureau of Fire Protection.
Gibutyag usab niini nga base sa ilang social media exploitation ug mga video nga nag-circulate online, ang biktima mismo maoy nagpasugod sa sunog. Dugang pa, misulay ang pipila ka silingan sa pagsulod sa balay aron untang tabangan ang biktima apan gipugngan sila niini.
Human makontrol sa mga bombero ang sunog ala uno dyes (1:10) sa hapon, narekober sa rescue team ang sunog nga lawas sa biktima.
Samtang, gipahimangno ni Ortencio sa publiko nga dili ikaulaw ang depresyon ug importante ang pagpangayo og tabang gikan sa pamilya, higala ug komunidad aron malikayan ang susamang insidente.