Dilaab sa paglaum ug determinasyon ang dinalian nga bitbit karon sa Northern Mindanao Region Diyes (10) Tennis Team samtang padayon kining nakigkompetensya sa elimination rounds alang sa elementary ug secondary boys and girls categories sa nagpadayong Palarong Pambansa sa Agusan del Sur.
Sa eksklusibong pakighinabi sa Bombo Radyo Malaybalay ngadto kang Tennis Secondary Girls Coach Swettie Rose Leuterio, iyang gipahayag nga dako ang ilang pagsalig nga magbunga og kadaugan ang ilang halos tulo ka tuig nga grabe nga preparasyon ug sakripisyo. Gibutyag ni Leuterio nga upat ka atleta ang nagrepresentar sa iyang kategorya diin duha niini gikan sa Dangcagan National High School ug duha usab gikan sa Infant Jesus School sa Valencia City, Bukidnon, samtang gikatakda usab nga mosalmot ang doubles category karong adlawa.
Dugang pa sa opisyal, dako ang ilang pasalamat sa grabe nga pag-atiman ug preparasyon sa host province ilabina sa pagbutang og mga aircon sa mga billeting quarters aron masiguro ang kaluwasan sa mga atleta batok sa delikado nga heat index nga mupalo sa kwarenta hangtod kwarenta’y uno (40-41) degrees Celsius. Sa pagkakaron, nangayo og dugang pag-ampo ug suporta si Leuterio gikan sa tibuok Bukidnon alang sa padayong kampanya sa mga batan-ong atleta sa maong nasudnong kompetisyon.