Gikumpirma sa gobyerno sa Timor-Leste nga ilang ipapauli sa Pilipinas ang kanhing kongresista nga si Arnolfo Teves Jr. tungod sa kakulangan og legal nga dokumento human makansela ang iyang pasaporte.
Matod sa Timor-Leste, delikado ug dili madawat ang presensya ni Teves sa ilang nasud ug kini nakadaot sa maayong relasyon sa Pilipinas. Gidugang pa nga ilang tinguha nga mapanalipdan ang ilang integridad sa pakig batok sa transnational crimes.Gawas sa pagpauli kaniya, gibawal na usab si Teves nga mosulod sa Timor-Leste sulod sa 10 ka tuig, base sa ilang migration ug asylum laws.
Sa pikas nga bahin,gipadayag sa Department of Justice nga andam kini bisan unsang orasa kung ibalik sa Timor Leste si kanhi Rep. Arnolfo “Arnie” Teves Jr.Si Teves maoy gitumbok nga utok sa pagpatay kang Negros Oriental Governor Roel Degamo ug laing siyam ka mga tawo nga nalambigit sa pagpamusil.Ang Departament of Justice mihimo sa pahayag human sa gikataho nga pagdakop kang Teves sa Timor Leste Immigration gikan sa iyang pinuy-anan.
Ang DOJ nagpadayon sa pagmonitor sa katapusang desisyon ni Timor Leste sa hangyo sa Pilipinas nga extradition batok kang Teves.Si Teves nag-atubang og daghang kaso sa pagpatay, lakip ang pagpatay nga nahitabo niadtong 2019 sa iyang probinsiya.