Giklaro ni Bukidnon 2nd District Representative John Keith Flores nga dako’g papel ang pagbati sa katawhan sa Mindanao sa iyang desisyon nga mo-abstain sa impeachment vote batok kang Bise Presidente Sara Duterte, apan gipatin-aw niini nga wala kini nagpasabot nga supak siya sa mga artikulo sa impeachment.
Matod ni Flores, dili kaya sa iyang konsensya nga mobotar kontra sa impeachment tungod kay personal niyang nadunggan ang mga ebidensya nga gipresentar atol sa mga hearing sa House Committee on Justice diin miyembro siya isip Vice Chairperson. Apan luyo niini, giila usab niya nga daghang katawhan sa Mindanao ang nagpakita gihapon og suporta sa Bise Presidente, hinungdan nga nakaapekto kini sa iyang pinal nga desisyon.
Dugang pa sa kongresista, ang iyang kasinatian isip miyembro sa impeachment prosecutors niaging tuig ug ang iyang pamilyaridad sa kaso maoy usa sa mga rason nganong gisaligan siya sa ubang miyembro sa Kamara alang sa maong tahas. Gidepensahan usab ni Flores ang iyang pagkapili isip usa sa mga public prosecutor ngadto sa Senado, diin iyang gipahayag ang iyang dakong pagtahod sa kolektibong desisyon sa iyang mga kaubang magbabalaod nga misalig sa iyang katakos bisan pa man sa iyang pag-abstain sa botasyon.