Dakong kalipay ug kakurat ang gibati sa nag Rank 1 sa Licensure Examination for Professional Teachers (LEPT) nga estudyante gikan sa Bukidnon State University.
Sa pakighinabi sa Bombo Radyo Malayabalay kang Princess Willah M. Yamahon miangkon nga wala gyud niini damha ang resulta.
Matud pa ni Princess, sa dihang iyang nasayran ang balita pinaagi sa group chat, grabe ang iyang kalipay ug kakurog sa emosyon hangtod nga nakahilak kini.
Gibutyag usab ni Princess nga daghan siya og naagian nga kalisdanan sa pagtuon, lakip na ang self-doubt, pressure, ug pinansyal nga hagit.
Apan nagpabilin siya nga determinado ug nagpadayon sa iyang tinguha nga makab-ot ang pangandoy nga mahimong usa ka magtutudlo.
Gipasalamatan niini ang iyang pamilya ilabi na ang iyang mga ginikanan nga walay hunong sa pagsuporta kaniya, ingon man ang iyang pagtuo sa Ginoo nga mitabang kaniya sa tibuok proseso.
Gidasig usab ni Princess ang mga magkuha og examination nga magpabilin nga andam, disiplinado, ug consistent sa ilang pagtuon.Â