Nag-atubang karon sa dakong pagkalugi ang mga mag-uuma sa mais sa Barangay Kalasungay ning siyudad tungod sa grabeng epekto sa El Niño nga mikutlo sa ilang puhunan.
Sa pakighinabi sa Bombo Radyo Malaybalay, gibutyag ni Tessie Cabaldon, opisyal sa Corn Growers Association sa Purok 4, nga dako nga hagit ang kakuwang sa ulan ilabi na sa mga mais nga padulong na unta abunohan. Sumala ni Cabaldon, bisan ang mga mag-uuma nga duna’y 1.5 ka hektarya nga umahan, naglisod na sa pagbawi sa nagmahal nga labor ug abuno tungod sa pagkahuyang sa ilang mga tanom.
Gisuportahan usab kini sa mag-uuma nga si Judy Salobo, kinsa miingon nga halos 30 ngadto sa 75 porsyento sa ilang maisan ang naapektuhan sa hulaw. Gibanabana nga moabot sa P25,000 ngadto sa P30,000 nga puhunan ang posibleng mawala sa matag mag-uuma tungod sa pagkaputot ug pagkahuyang sa mga mais.
Bisan pa man niini, duna’y gamay nga kahupayan human nag-apod-apod og mga binhi ang City Agriculture Office isip pagpangandam sa sunod nga tingtanom. Sa pagkakaron, hugot ang panawagan sa mga mag-uuma alang sa dugang ayuda ug suporta gikan sa gobyerno aron makabangon sa duguong epekto sa El Niño sa ilang panginabuhian.