Tingkagol na sa prisuhan ang usa ka 21-anyos nga lalaki human nasakpan sa akto nga nangawat og cellphone sulod sa usa ka panimalay sa Barangay Kisolon, Sumilao, Bukidnon, niadtong Mayo 9.
Sa report gikan sa Sumilao Municipal Police Station, naila ang suspek nga si alyas “Ro-ro,” residente sa maong dapit. Nasayran nga pasado alas-12:50 sa kaadlawon dihang miagi sa kisame ang suspek aron makasulod sa balay sa usa ka 36-anyos nga babaye. Malampuson untang nakuha sa suspek ang usa ka cellphone nga nagkantidad og P5,000, apan naaktuhan kini sa biktima hinungdan sa dinaliang pagpangayo og tabang sa mga barangay tanod.
Pinaagi sa gilusad nga hot pursuit operation, malampusong nasikop ang suspek sa iyang pinuy-anan ug narekober ang kinawat nga butang. Sa pagkakaron, giandam na sa kapulisan ang pormal nga kasong robbery batok sa suspetsado kinsa temporaryo karong nagtingkagol sa custodial facility sa Sumilao MPS.