Nagtinguha karon sa dinaliang tabang ang mga mag-uuma sa mais sa lalawigan tungod sa grabeng epekto sa El Niño nga mikutlo sa ilang panginabuhian.
Sa pakighinabi sa Bombo Radyo Malaybalay, gibutyag ni Loida Badajos, sakop sa Corn Growers Association, nga daghan sa ilang mga kauban ang wala makapugas sa tukmang panahon tungod sa tumong nga kauga sa yuta. Nasayran nga bisan ang mga nakatanom na, napugos sa pag-usab og “butod” o pag-replant human nangalaya ug nangamatay ang ilang mga pananom tungod sa kakuwang sa ulan.
Gawas sa hulaw, gipadangat usab ni Badajos ang mulo sa mga mag-uuma tungod sa nagkataas nga presyo sa abono ug uban pang galastuhan sa umahan, samtang nagpabilin namong ubos ang presyo sa palit sa ilang ani. Tungod niini, dakong kapildihan ang giatubang sa sektor sa agrikultura sanglit dili na mabawi ang ilang puhunan. Sa pagkakaron, dako ang panghinaut sa mga mag-uuma nga mahatagan sila og igong suporta sa kagamhanan ug moayo na ang dagan sa panahon aron makabangon gikan sa maong krisis.