Napalgan ang usa ka patay’ng lawas sa usa ka lalaki sa Manupali River, P-5, Barangay Poblacion, Lantapan, Bukidnon, kagahapong adlawa, Mayo 8 ning kasamtangang tuig. Ang biktima giingong walo na ka adlaw nga nawala sa wala pa kini nadiskubrehan sa usa ka residente pasado alas-4:30 sa hapon.
Sa inisyal nga impormasyon, nagkatkat matud pa ang biktima sa usa ka kahoy aron manguha og dugos apan aksidente kining nahulog sa bakilid nga bahin ug nahulog sa tubig.
Tungod sa gidugayon sa panahon, ang lawas anaa na sa “advanced state of decomposition” o aduna nay dili maayong baho ug gikutkot na sa ulod ang pipila ka parte niini.
Nakit-an ang patayng lawas sa biktima nga nasangit sa mga kawayan ug nalubog ang katunga sa lawas niini sa suba.
Dali nga miresponde ang mga sakop sa BFP Lantapan ubos sa pagpanguna ni SFO3 Anthony A. Salinas, dungan sa PNP Lantapan, MDRRMO, ug mga CVO sa barangay aron makuha ang biktima.
Human sa malampusong retrieval operation, gitugyan na ang patayng lawas sa mga otoridad alang sa dugang nga proseso.