Lima ka mga sakop sa kapulisan ang naangol human gipaulanan og bala samtang nagsilbi og warrant of arrest batok sa usa ka suspek sa murder sa Barangay Lumbak, Buadipuso Buntong, Lanao del Sur, kagahapong adlawa, Mayo 4, 2026.
Sumala ni P/Capt. Steffi Salanguit sa PRO-BAR, kalit lang gipabuthan og sniper ang mga operatiba nga gipangulohan ni P/Capt. Nur Basher Cayda sa dihang padulong na kini sa tagoanan ni Sukair Diongcat.
Agig tubag sa maong pagpangatake, daling nagpadala og dugang pwersa ug duha ka light armored vehicle si PCol. Caezar P. Cabuhat aron selyohan ang seguridad sa lugar.
Ang mga samarang pulis gidala na sa tambalanan samtang padayon pa ang clearing operations sa maong dapit.
Kini nga insidente nagpakita sa kakuyaw nga giatubang sa mga otoridad sa paggukod sa mga wanted nga kriminal. Nagpabilin karon nga alerto ang tibuok pwersa sa kapulisan sa probinsya aron madakpan ang maong suspek.Â