Opisyal nang giduso sa Sangguniang Panlungsod sa dakbayan sa Valencia ang sugyot sa pag-convert sa siyudad gikan sa pagka-component city ngadto sa usa ka Highly Urbanized City (HUC).
Kini nahitabo atol sa ika-36 nga regular session sa konseho kagahapong adlawa. Sa pakighinabi sa Bombo Radyo Malaybalay kang Atty. Heinz G. Villanueva, the City Administrator of Valencia City, gihiskutan niini ang maong sugyot nga hingpiton kini sa dili madugay pinaagi sa pagsumite sa gikinahanglang resikitos ug proseso.
Subay sa datus gikan sa Philippine Statistics Authority (PSA), gipaambit sa abogado nga ang Valencia aduna nay populasyon nga moabot sa 223,620, nga sobra na sa 200,000 nga statutory minimum requirement aron ma-deklarang HUC ang usa ka dapit. Gawas sa populasyon, nakapasar usab ang siyudad sa aspeto sa panalapi.
Ang Valencia aduna nay annual income nga kapin P400 milyon, tandi sa gikinahanglan nga 50 million pesos lamang nga income requirement para sa HUC status.
Apan gipatin-aw usab sa abogado nga gikinahanglan ang usa ka plebisito sa tibuok probinsya sa Bukidnon aron hingpit nga mahimong Highly Urbanized City (HUC) ang Valencia. Kini base sa mando sa Supreme Court diin ang tanang botante sa probinsya ang magbuot kon uyon ba kini nga mahimong independente ang maong iyudad.
Gidugang pa niini nga dako ang benepisyong madawatan sa syudad diin laumang mudako ang pondo o national budget ug mupaspas ang kalamboan sa dakbayan sa Valencia sanglit mamahimo na kining usa ka Highly Urbanized City.