Magpokus karong tuiga ang kooperasyon tali sa Philippines ug sa United Nations sa mga inisyatiba nga magpalig-on sa social protection, magpalambo sa paghimo og trabaho, ug mopadali sa energy transition.
Ang mga prayoridad alang sa 2026 gihisgutan sa Third Joint Steering Committee meeting nga gitambongan sa UN Philippines, Department of Economy, Planning and Development (DEPDev), ug Department of Foreign Affairs.
Sa maong panagtigom, gisusi ang pag-uswag sa 2024 hangtod 2028 UN Sustainable Development Cooperation Framework para sa Pilipinas.
Gipresentar usab sa UN ang 2026 Joint Work Plans nga nagtumong sa pagpalapad sa mga solusyon batok sa nagkadugtong nga mga hagit.
Lakip sa mga prayoridad ang pagpalig-on sa social protection ug human capital systems aron mas andam sa mga krisis, pagpalambo sa trabaho ug kabag-ohan ilabina alang sa mga bulnerableng sektor ug micro, small and medium enterprises.
Usa pa sa tutokan mao ang pagpauswag sa energy transition, disaster resilience ug environmental sustainability, lakip ang pagpatuman sa nasudnong climate commitments.
Makigtimbayayong usab ang Pilipinas ug ang UN sa pagpalig-on sa maayong pagdumala, digital transformation, ug padayon nga suporta sa proseso sa kalinaw ug transisyon sa Bangsamoro Autonomous Region in Muslim Mindanao.