MALAYBALAY CITY, BUKIDNON – Kasamtangan karong nagtingkagol sa prisuhan ang usa ka sales boy human kini nasikop sa gikasang operasyon batok ilegal nga droga sa Purok 2, Barangay Dos, Malaybalay City, niadtong Mayo 1.
Giila ang dinakpan nga si Juluen Daniel Bandolon, 30-anyos, ug residente sa Barangay 9 sa maong dakbayan. Nasayran nga si Bandolon giilang Top 9 Most Wanted Person sa lebel sa probinsya.
Nasikop ang suspek pinaagi sa gahum sa warrant of arrest nga gi-isyu niadtong Pebrero 13, 2026, tungod sa paglapas sa Section 5 ug 11 sa Republic Act 9165 o Comprehensive Dangerous Drugs Act of 2002. Tungod kay seryoso ang maong mga kaso, walay piyansa nga gitakda ang korte alang sa iyang temporaryong kagawasan.
Sa pagkakaron, anaa na sa kustodiya sa Malaybalay City Police Station ang dinakpan alang sa saktong disposisyon ug dokumentasyon sa iyang kaso.