Gikatakdang modawat og laing dungog ang Pinoy boxing legend nga si Manny Pacquiao human gianunsyo nga maapil siya sa Class of 2027 sa U.S. National Boxing Hall of Fame.
Gihimo ang maong pahibalo ni boxing executive Eric Schmidt atol sa ika-3 nga Pacquiao-Elorde Awards Night didto sa Manila. Sumala ni Schmidt, ang paglakip kang Pacquiao usa ka pag-ila sa iyang dako nga kontribusyon sa kasaysayan sa boksing sa Amerika. Gilauman nga ang induction ceremony ipahigayon sa Abril 25, 2027, didto sa Montebello, California.
Kahinumduman nga sa niaging tuig (2025), pormal na sab nga naapil ang “People’s Champ” sa International Boxing Hall of Fame didto sa New York. Si Pacquiao nailhan sa tibuok kalibutan isip bugtong boksidor nga nakakuha og world titles sa walo ka managlahing weight divisions.
Pinaagi niining bag-ong pasidungog, mas gipalig-on pa ni Pacquiao ang iyang legasiya isip usa sa labing bantogan nga boksidor sa tibuok kasaysayan sa maong dula.