Nagmalampuson ang kapulisan sa probinsya sa Bukidnon sa gihimong managlahing operasyon nga miresulta sa pagkasikop sa duha ka giilang “most wanted person” nga nag-atubang og bug-at nga mga kaso.
Sa hiniusang pwersa sa Kitaotao Municipal Police Station ubos sa pamunoan ni PMAJ Jose Regner M. Sevilleno, kauban ang Valencia City Police Station ug uban pang yunit sa Bukidnon PNP, nasikop ang usa ka 21-anyos nga mamumuo didto sa Sitio Palapao, Barangay Panganan, Kitaotao.
Ang susprtsado, kinsa giilang Top 8 Most Wanted Person sa City Level, gidakop pinaagi sa gahum sa Warrant of Arrest alang sa kasong Statutory Rape.
Gikataho usab nga walay piyansa nga girekomenda alang sa temporaryong kagawasan niini. Sa pagkakaron anaa na siya sa kustodiya sa Kitaotao MPS alang sa saktong dokumentasyon.
Samtang sa Dakbayan sa Malaybalay, usa usab ka drayber ang nasikop sa mga personahe sa Malaybalay City Police Station nga gipangulohan ni PLTCOL Joepet B. Paglinawan.
Ang operasyon, nga gipahigayon sa Purok 9, Barangay Sumpong, miresulta sa pagkasikop sa usa ka 48-anyos nga lalaki.
Ang maong dinakpan giila nga Top 9 Most Wanted Person sa lebel sa probinsya ug dakbayan.
Gidakop kini base sa warrant alang sa paglapas sa Republic Act 9165 o ang Comprehensive Dangerous Drugs Act of 2002.
Sama sa unang suspetsado, wala usab kini girekomendang piyansa ug kasamtangang anaa sa Malaybalay City Police Station alang sa saktong disposisyon.