Gipasalig sa Bukidnon Police Provincial Office (BPPO) nga anaa na sa “full swing” ang imbestigasyon ug manhunt operation aron madakpan ang mga responsable sa pagpamusil-patay sa usa ka negosyante og isda sa dakbayan sa Valencia niadtong milabayng adlaw.
Sa usa ka eksklusibong pakighinabi, gibutyag ni PCPT. Sheila Joy P. Jangad, ang Spokesperson sa Bukidnon Police Provincial Office, nga aduna nay gigunitan nga mga lig-on nga anggulo ug posibleng motibo sa maong krimen.
Dugang pa sa opisyal, walay puas ang gihimong pagpaniid sa mga intel operatives aron mailhan ang mga suspetsado nga daling miikyas human sa insidente.
Matud pa niini, gipahigayon na ang mas lawom nga case conference sa mga otoridad aron itandi ang mga nakuha nga ebidensya gikan sa crime scene.Â
Gipaniguro usab nga dili mohunong ang kapulisan hangtod nga dili mahatagan og hustisya ang biktima. Gibutyag ni Jangad, nga sa pagkakaron aduna nay mga konkretong anggulo nga ilang ginasubay. Â
Sa kasamtangan, padayon ang gihimong case monitoring ug intelligence gathering sa mga personahe sa Valencia City Police Station uban ang suporta sa probinsyal nga buhatan. Gipaniguro sa kapulisan nga luwas gihapon ang syudad apan nagpabilin silang alerto sa bisan unsang hulga sa seguridad.
Naghangyo usab ang kapulisan sa mga nakasaksi o kadtong adunay impormasyon mahitungod sa gikahimutangan sa suspetsado nga makig-alayon sa otoridad.
Kahinumduman nga gipusil-patay ang usa ka 53-anyos nga negosyante og isda sa Purok 15, Barangay Bagontaas, niadtong miaging adlaw sa wala mailhing suspek nga daling miikyas human sa insidente.Â