Gitudlo nga tinubdan sa mga insidente sa pagpangdunggab ning lalawigan ang pagkalango sa ilimnong makahubog. Sumala kini sa gipagawas nga report sa Bukidnon Provincial Police Office (BPPO).
Sa dugang impormasyon nga gipaambit ni PCPT. Sheila Joy P. Jangad, tigpamaba sa BPPO, nahimo nang sumbanan o trend sa mga krimen sa Bukidnon ang mga pagpangdunggab nga resulta sa panag-uban sa pag-inom.
Gipasabot sa opisyal nga kon mahubog na ang mga indibidwal, dali na silang “magkapikuna’y” o mawad-an og pasensya sa usag-usag. Kini nga sitwasyon misangpot sa init nga panaglalis o heated argument nga nagresulta sa dugoong pagpangdunggab.
Samtang sa pikas bahin, gawas sa mga insidente sa pagpangdunggab, nakatala usab ang Bukidnon Provincial Police Office (BPPO) og pagsaka sa mga aksidente sa trapiko sa tibuok probinsya.
Gidugang sa opisyal, nga ang mga aksidente sa trapiko mao usab ang usa sa mga nag-unang insidente nga natala ning bulana. Tungod niini, ang kapolisan padayon sa paghatag og mga preventive tips ug hugot nga nag-monitor aron mahatagan og hustisya ang mga biktima sa maong mga panghitabo.