Gibutyag ni kanhi Ombudsman Samuel Martires nga andam niya atubangon “nga malipayon” ang posibleng imbestigasyon sa Kamara de Representantes kalabot sa alegasyon nga nakadawat kini og milyones ngs confidential funds gikan kang Vice President Sara Duterte.
Gipanghimakak usab ni Martires ang maong akusasyon ug giingong wala kini nakita nga rason aron imbestigahan pa siya gumikan dili na siya kabahin sa gobyerno.
Nag-ugat ang isyu sa affidavit ni Ramil Madriaga, nga nag-angkon nga siya ang naghatod og kapin ₱125 milyon sa nagkadaiyang lugar lakip na ang opisina sa Ombudsman.
Matud ni Madriaga, ang kwarta ginabutang sa mga sakyanan isip kabahin sa giingong pamaagi sa pag-deliver og dagkong kantidad.
Gikuwestiyon ni Martires ang kredibilidad sa affidavit ni Madriaga ug giingong walay rason nga padal-an siya og kwarta sa Bise Presidente.
Gipasabot usab niini nga wala niya gisuportahan si VP Sara sa miaging eleksyon.
Matud ni Martires, si Tito Sotto ug si Ping Lacson ang iyang gipili niadtong eleksyon, busa wala siyay rason nga dawaton ang bisan unsang pabor gikan kang Duterte.
Dugang pa niini, kaisa lamang sila nagkita sa Bise Presidente ug wala silay suod nga relasyon.
Gipanghimakak usab ni Martires ang pipila ka detalye sa pamahayag ni Madriaga nga iyang gihulagway nga dili katuohan.
Samtang, gibutyag usab sa testimonya ni Madriaga ang giingong kasabutan tali kang kanhi Pangulong Rodrigo Duterte ug Pangulong Ferdinand Marcos Jr. ang pagbahin sa mga posisyon sa gobyerno, diin giingong ilisan si VP Sara sa puwesto pag-abot sa 2025.