Patay ang usa ka 45-anyos nga lalaki human kini gipusil sa wala pa mailhing suspetsado samtang nag-atiman sa iyang muwebles sa likod-balay niini sa Purok 2, Barangay Dominorog, sa lungsod sa Talakag, Bukidnon.
Base sa otoridad, nahitabo ang krimen niadtong Abril 13 sa alas 7:30 sa gabii. Sa inisyal nga imbestigasyon, giingong busy ang biktima sa iyang trabaho sa likod sa ilang balay sa dihang kalit lang kining gipusil. Ang amahan sa biktima, kinsa nangandam na unta sa pagpahuway, mao na lamang ang nakadiskubre sa iyang anak nga nagdugo na ang nawong ug nagsandig sa estante human makadungog og kusog nga buto.
Daling gidala ang biktima sa Bukidnon Provincial Hospital sa Talakag apan gumikan sa grabeng samad nga naangkon niini, gibalhin kini sa Northern Mindanao Medical Center (NMMC) sa Cagayan de Oro City. Apan pagka-alas 3:00 sa kaadlawon niadtong Abril 14, nakabsan gayod sa iyang kinabuhi ang maong biktima.
Narekober sa Regional Forensic Unit sa dapit-nahitaboan ang usa ka basyo ug usa ka buhing bala sa caliber .45, lakip na ang usa ka fired bullet nga gipaubos na sa pagsusi sa mga eksperto.
Sa pagkakaron, nagpadayon ang lawom nga imbestigasyon sa Talakag Municipal Police Station aron matino ang motibo ug mailhan ang responsable sa maong pagpamatay. Nanawagan usab ang otoridad sa publiko nga makig-alayon kanila kon duna’y mahatag nga impormasyon alang sa daling kasulbaran sa maong krimen.