Nanguna sa listahan sa mga adunay labing daghang nominasyon ang pop superstar nga si Taylor Swift alang sa umaabot nga American Music Awards (AMA). Niining tuiga, nakakuha si Swift og kinatibuk-ang walo ka nominasyon, lakip na ang mga dagkong pasidungog sama sa Artist of the Year, Song of the Year alang sa iyang kanta nga “The Fate of Ophelia,” ug Album of the Year alang sa iyang album nga “The Life of a Showgirl.”
Kini nga kalampusan dugang sa iyang mga rekord sa AMA, diin siya na ang naghupot sa titulo isip artist nga adunay pinakadaghang daog sa kasaysayan sa maong award-giving body. Sa miaging tuig, nakadawat usab siya og unom ka nominasyon, apan mas nidaghan pa kini karon.
Dili sab layo ang gintang sa iyang mga kaatbang tungod kay nagsunod kaniya sila si Sabrina Carpenter, Olivia Dean, SOMBR, ug Morgan Wallen nga pulos nakakuha og tag-pito ka nominasyon. Ang mga mananaog pilion pinaagi sa boto sa mga fans ug ipahibalo kini sa usa ka live nga seremonyas didto sa Las Vegas karong Mayo 25, diin ang sikat nga si Queen Latifah ang magsilbing host.