Hugot nga gituki ang usa ka mulo kalabot sa isyu sa gikaingong pag-detain sa mga patay’ng lawas sa pipila ka ospital sa Bukidnon tungod sa wala mabayring obligasyon sa panalapi.
Atol sa usa ka forum kagahapong adlawa, Abril 14 ning kasamtangang tuig, gihistugatan ang maong butang diin gikabalak-an ang kakulang og aksyon lakip na ang pagkapakyas sa pipila ka pasilidad sa pagtuman sa Republic Act 9439, o ang Hospital Detention Law.
Gihisgutan sa maong mulo ang usa ka insidente sa Valencia City diin milapas na og 24 ka oras ug nagsugod na sa pagpanimaho ang usa ka patay’ng lawas una pa kini gipagawas sa ospital. Tungod niini, gipangutana ang Department of Health (DOH) kon asa mamahimong mudangop ang mga kabus nga pamilya aron mapanalipdan ang ilang katungod batok sa maong ilegal nga pamaagi sa mga balay tambalanan.
Agig tubag sa maong isyu, nanawagan ang Department of Health (DOH) Region 10 sa publiko nga ipadangat diretso sa ilang buhatan ang susamang insidente.
Matud ni Dr. Sulpicio Henry M. Legaspi Jr., Regional Director sa DOH CHD-NM- REGION 10, idangop lamang ang mga pormal nga reklamo kon adunay mga ospital nga padayong nagasupak sa balaod pinaagi sa pag-detain sa mga patay’ng lawas tungod sa wala mabayring obligasyon aron maaksyunan gilayon kini.
Gipasabot sa direktor nga adunay proseso sa pag-access sa Medical Assistance to Indigent Patients (MAIP) nga pundo. Sa maong proseso, kuhaon o i-deduct gikan sa kinatibuk-ang bayrunon.
Gisiguro niini nga kon moagi sa saktong proseso ug mapasa ang gikinahanglang mga dokumento, pangitaan kini og paagi sa DOH nga ma-zero-out ang nahabiling balanse aron dili na mabalaka ang mga pamilyang naglisod.