Nahimong init nga hisgutanan karon sa social media ang resulta sa bag-ohay lamang nahuman nga Laga ta Bukidnon 2026, dungan sa nagpadayong kasaulogan sa Kaamulan Festival.
Sentro sa kontrobersiya ang pagsaway sa pipila ka mga netizens ngadto sa gideklarang mananaog nga si Ross Saguilan Lungayan, ang pambato sa dakbayan sa Valencia.
Luyo sa malampusong pagdepensa sa korona, nakadawat ang rayna og nagkadaiyang negatibong komento ug pagpakaulaw online.
Gawas niini, dako usab nga isyu kalabot na sa paprempyo sa maong kompetisyon nga mikabat lamang matud pa sa kantidad nga P5,000.00, diin hangtud karun nagpabiling kwestyonable ang maong hisgutanan gumikan ang kalihukan usa sa sentro sa selebrasyon sa Kaamulan alang sa mga kaigsuonang lumad.
Sa pakighinabi sa Bombo Radyo Malaybalay kang Jose Jun Galario, ang consultant ug tigpamaba sa Mayor sa Dakbayan sa Valencia, giklaro niini ang maong isyu sa kantidad sa nadawat nga premyo sa mamanaog nga nagikan sa dakbayan, apan gipasabot usab niini nga wala silay mamahimo niini gumikan pagbuot kini sa probinsyal nga kagamhanan ang kabahin sa gitagana nga tanyag sa gipahigayon nga Laga ta Bukidnon 2026.
Gidugang pa ni Galario nga ang lokal nga pagamdahanan na lamang sa dakbayan niini ang maghatag og dugang pahalipay.
Subay niini, isip pagpakita og suporta sa lokal nga kagamhanan lakip na ang pagpasalamat sa pagdala og dungog sa dakbayan, naghatag og cash incentives ang LGU-Valencia sa ilang mga pambato nga nagmalampuson sa Laga ta Bukidnon 2026, isip pag-ila sa ilang dedikasyon, paningkamot, ug sakripisyo sa tibuok kompetisyon.
Sumala sa pamahayag ni Jun M. Galarion, Jr., ang maong inisyatiba usa usab ka paagi aron mapalig-on ang moral sa mga partisipante ug mapadayon ang kahinam sa pagsuporta sa mga kalihokan nga nagpasigarbo sa kultura ug talento sa Valencia City.