Mitahan sa mga awtoridad niadtong Lunes sa gabii, Abril 13, 2026, si Cavite 4th District Representative Francisco Kiko Barzaga human nag-isyu og warrant of arrest ang Makati Regional Trial Court may kalabotan sa walo ka kaso sa cyber libel.
Sumala sa Branch 147 sa korte sa Makati, gi-ordena ang mga pulis nga dakpon si Barzaga ug dalhon dayon sa korte.
Gitakda usab ang iyang piyansa nga ₱48,000 matag kaso, o total nga ₱384,000 alang sa tanang walo ka kaso.
Sa warrant nga pirmado ni Presiding Judge Karla Regina D. Valera-Chua, gimanduan ang mga otoridad nga mogamit og body-worn camera ug laing recording device subay sa patakaran sa Korte Suprema.
Kahinumduman, nga nasuspinde na si Barzaga isip representante sa House of Representatives sa Kongreso tungod sa giingong dili maayong pamatasan sulod sa plenaryo.