Misuporta ang boxing legend ug kanhi Senador Manny Pacquiao sa tinguha sa Pilipinas nga makakuha og lingkuranan sa United Nations (UN) Security Council alang sa terminong 2027-2028.
Sa iyang pakigpulong atol sa usa ka kalihukan sa UN headquarters sa New York, gipadayag ni Pacquiao nga ang sports usa ka epektibong himan aron makab-ot ang kalinaw ug panaghiusa sa tibuok kalibutan.
Matud pa sa “Pambansang Kamao,” ang iyang kasinatian isip boksingero nagtudlo kaniya nga ang disiplina ug fair play sa sports mahimong ehemplo sa paghusay sa mga panagbangi tali sa mga nasud.
Gidugang pa ni Pacquiao nga ang Pilipinas andam mohatag og dakong kontribusyon sa pagmintinar sa kaluwasan ug kalinaw sa kalibutan kon mahatagan og kahigayonan sa maong posisyon.
Ang maong tinguha sa nasud kabahin sa tinguha sa administrasyong Marcos nga mapalig-on ang presensya sa Pilipinas sa international community ug mapanalipdan ang interes sa mga Pilipino sa tibuok kalibutan.