Gipahibalo si Agusan del Sur Governor Santiago Cane Jr. nga mohatag siya og P1-milyon nga reward o ganti ngadto sa bisan kinsang atleta gikan sa ilang probinsya nga makaguba o makahimo og bag-ong national record sa umaabot nga Palarong Pambansa 2026.
Ang maong dakong kompetisyon gikatakdang ipahigayon sa Agusan del Sur gikan sa Mayo 24 hangtod 31. Giklaro sa gobernador nga ang maong insentibo ihatag lamang kon ang atleta makalapas sa kasamtangang rekord sa tibuok nasod ug dili lang rekord sa Palaro. Kinahanglan usab nga kini sertipikado sa Philippine Sports Commission (PSC) aron mahimong opisyal.
Ang maong anunsiyo gihimo human hapit na makatala og bag-ong rekord si Christine Castro sa 100-meter hurdles atol sa Caraga Regional Athletic Games (CRAG) didto sa Surigao City, butang nga nakahatag og dugang kadasig sa mga lokal nga atleta sa probinsya.