Narekober sa mga tropa sa 4th Infantry “Diamond” Division, Philippine Army ang tulo ka tag-as nga kalibre sa armas didto sa Sitio Bato, Barangay Bitaugan, San Miguel, Surigao del Sur niadtong milabayng adlaw ning kasamtangang tuig.
Lakip sa mga nakuha sa gipahigayon nga operasyon mao ang usa ka Czech VZ rifle, usa ka 5.56mm Bushmaster Carbine, ug usa ka 5.56mm Rock Island Carbine nga nakubkuban sa maong dapit.
Matud sa 4th Infantry Division, kining maong lakang kabahin sa nagpadayong security operations batok sa Communist Terrorist Groups (CTGs) sa rehiyon sa Caraga ug Northern Mindanao.
Sa pagkakaron, ang maong mga war materials anaa na sa kustodiya sa militar alang sa saktong disposisyon ug imbentaryo.
Samtang kahinumduman nga patay sa engkwentro tali sa militar ang duha ka miyembro sa New People’s Army (NPA) nga giilang sila si alyas Ka Rex ug Ka Bunso sa kabukiran sa Barangay Nurcia, Lanuza, Surigao del Sur niadtong Marso 22, 2026.
Ang maong operasyon sa 36th Infantry Battalion miresulta usab sa pagkumpiska sa upat ka tag-as nga kalibre sa armas human mibiya ang nahabiling mga kaubanan sa SRSDG Westland, NEMRC.
Matud sa taho, ang maong engkwentro nagsumikad sa mga impormasyon gikan sa mga residente nga nakasinati og pagpanghulga ug extortion gikan sa nahisgutang grupo.
Sa pagkakaron, gipahugtan pa sa 401st Infantry Brigade ang ilang seguridad sa dapit aron masiguro ang kalinaw ug proteksyon sa mga sibilyan sa rehiyon.